މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 37 ވަނާ މާއްދާގެ ދަށުން ދައުލަތުގެ އެންމެހާ އިދާރާތަކުންވެސް މަދުވެގެން އަހަރަކު އެއްފަހަރު އަމިއްލަ އިސްނެގުމަށް ހާމަކުރަން މައުލޫމާތުތަކެއް ހުރެއެވެ. މިގޮތުން މި މާއްދާގެ (އ)ގެ ދަށުން ހާމަކުރަން ލާޒިމުކުރަނީ ރައްޔިތުނަންނަށް އޭގެ އަސަރެއް ފޯރާގޮތަށް ނިންމާފައިވާ ނިންމުންތަކާއި، އެ ނިންމުންތައް ނިންމާފައިވާ ސަބަބުތަކާއި، އެ ނިންމަުންތަކުން ދޭހަވާ މާނަކުރުންތަކާއި، އެކަމާ ގުޅޭ ފަސްމަންޒަރު އަންގައިދޭ ތަފުސީލެވެ.
ދައުލަތުގެ އިދާރާތަކުން މި މައުލޫމާތުތަށް ޝާއިއުކުރުމުން ދަނީ އިދާރާގެ ވެބްސައިޓުގަޔާއި، އިދާރާގެ އަހަރީ ރިޕޯޓުގައެވެ. އެސޯސިއޭޝަން ފޮރ ޑިމޮކްރަސީ އިން ދަ މޯލްޑިވްސް (އޭ.ޑީ.އެމް) އިން ކުރިއަށް ގެންދިޔަ މަޝްރޫއެއްގެ ދަށުން ދައުލަތުގެ 73 އިދާރާއެއްގެ ޝާއިއުކުރުންތަކާއި ވެބްސައިޓުތަކުން މި މައުލޫމާތު ލިބެން ހުރިތޯ ބަލާ، އެ މައުލޫމާތުތައް ޝާއިއުކުރުމަށް ވަނީ ބާރުއަޅާފައެވެ. މި މަޝްރޫއުގެ ދަށުން ހޯދުނު ހޯދުންތައް ވަނީ އާރް.ޓީ.އައި 37 ރިޕޯޓުގައި ޝާއިއުކޮށްފައެވެ.
އޭ.ޑީ.އެމް އިން ދަނީ ދައުލަތުގެ އިދާރާތަކުން އަމިއްލަ އިސްނެގުމަށް ހާމަކުރަންޖެހޭ މައުލޫމާތު ހާމަކުރޭތޯ ބަލާ، އެ މައުލޫމާތުތައް ހާމަކުރުމަށް ބާރުއަޅަމުންނެވެ. ވަކިވަކި ދައުލަތުގެ އިދާރާތަކުން އަމިއްލަ އިސްނެގުމަށް މައުލޫމާތު ހާމަކޮށްފައިވާ މިންވަރުތައް ވަނީ ޕްރޮޖެކްޓް ޒިންމާދާރު ވެބްސައިޓުގައި ޝާއިއުކުރެވިފައެވެ.
